ჩინეთმა სატვირთო მანქანების გადასაზიდად ტრანსკასპიური საერთაშორისო სატრანსპორტო მარშრუტის (შუა დერეფნის) გამოყენება დაიწყო. 3 ივლისს, ყაზახეთის ქალაქ კურიკის პორტში, 26 სატვირთო მანქანისგან შემდგარი პირველი კოლონა ბორან „მერკური-1“-ზე ჩაიტვირთა. ბორანი ASCO-ს საზღვაო სატრანსპორტო ფლოტს ეკუთვნის და უკვე აზერბაიჯანში ჩავიდა.
შემდეგ, სატვირთო მანქანები საქართველოსა და თურქეთის გავლით ევროპის ქვეყნებში გაემგზავრებიან. ეს ღონისძიება შუა დერეფნის სატრანზიტო შესაძლებლობების განვითარებაში მნიშვნელოვან ნაბიჯს წარმოადგენს, რომელიც თანდათან აზიიდან ევროპაში საქონლის ტრანსპორტირების მნიშვნელოვან ალტერნატივად იქცევა.
აღსანიშნავია, რომ მიმდინარე წლის მაისში ჩინეთმა შუა დერეფნის გასწვრივ უკვე გაგზავნა სამი სატვირთო მანქანა, რომელთა საერთო წონა 80 ტონაა. ეს აჩვენებს ჩინეთის მზარდ ინტერესს და მზადყოფნას, გამოიყენოს ეს მარშრუტი საქონლის უფრო სწრაფი და ეფექტური მიწოდებისთვის.